ராஜ்மா சூப்

என்னென்ன தேவை?

ராஜ்மா – 1/4 கப்,
வெங்காயம் – 1,
தக்காளி – 1,
பூண்டு – 3 பல்,
பிரிஞ்சி இலை – 1,
வெண்ணெய் – 1 டீஸ்பூன்,
ஃப்ரெஷ் க்ரீம் – 1 டேபிள்ஸ்பூன் (தேவைப்பட்டால்),
உப்பு – தேவையான அளவு,
மிளகுத் தூள் – 1/2 டீஸ்பூன்.

எப்படிச் செய்வது?

ராஜ்மாவை தண்ணீரில் 12 மணி நேரம் ஊற வைக்கவும். குக்கரில் வெண்ணெய் சேர்த்து, பிரிஞ்சி இலை, பூண்டைப் போட்டு வதக்கவும். அத்துடன் பொடியாக நறுக்கிய வெங்காயம், தக்காளி சேர்த்து வதக்கவும். பிறகு, ஊற வைத்த ராஜ்மா, 2 கப் தண்ணீர் சேர்த்து 7 விசில் வரும் வரை வேக விடவும்.

அதை ஆற வைத்து அரைத்துக் கொள்ளவும். அரைத்த விழுதில் தேவையான தண்ணீர் சேர்த்து, உப்பு, மிளகுத் தூள் சேர்த்து 2 கொதி வந்ததும், ஃப்ரெஷ் க்ரீம் சேர்த்து சூடாகப் பரிமாறவும்.  ஃப்ரெஷ் க்ரீமுக்கு பதிலாக
2 டேபிள்ஸ்பூன் பால் சேர்த்தும் கொதிக்க விடலாம்.