இட்லி, தோசைக்கு சுவையான மிளகு காரச் சட்னி செய்வது எப்படி என்று பார்க்கலாம்.
மிளகு காரச் சட்னி செய்முறை விளக்கம்
தேவையான பொருட்கள் :
தக்காளி – 5 (பெரியது)
காய்ந்த மிளகாய் – 4
மிளகு – 1 தேக்கரண்டி
பெருங்காய தூள் – சிறிதளவு
நல்லெண்ணெய் – 2 குழிக்கரண்டி
கடுகு, உளுந்தம் பருப்பு – 1 தேக்கரண்டி
கறிவேப்பிலை – 2 ஆர்க்கு
உப்பு – தேவைக்கேற்ப
செய்முறை :
* தக்காளியை பொடியாக வெட்டிக் கொள்ளவும்.
* வாணலியில் ஒரு ஸ்பூன் எண்ணெய் ஊற்றி மிளகாயை சிவக்க வறுத்து எடுக்கவும்.
* அடுத்து அதில் மிளகை போட்டு வெடித்ததும் உடனே எடுத்துக் விடவும். (மிளகாயை எடுத்ததும் அடுப்பை அணைத்துவிட்டு மிளகை போடவும். இல்லையென்றால் வெடித்து சிதறும்.)
* வாணலியில் மேலும் சிறிது எண்ணெய் ஊற்றி, பெருங்காய துள் தூவி, தக்காளியை போட்டு உப்பு சேர்த்து வதக்கவும்.
* தக்காளி நன்றாக குழைய வதங்க வேண்டும். வதங்கிய பின்னர் எடுத்து, வறுத்த எல்லாவற்றையும் சேர்த்து மிக்ஸியில் அரைக்கவும்.
* தாளிப்பு கரண்டியில் எண்ணெய் ஊற்றி காய்ந்ததும், கடுகு, உளுத்தம் பருப்பு சேர்த்து வெடித்ததும், கறிவேப்பிலை போட்டு தாளித்து, அரைத்த சட்னியில் கொட்டி கலந்து விடவும்.
* சுவையான மிளகு கார சட்னி தயார்.
* இட்லி, தோசையுடன் சாப்பிட சுவையாக இருக்கும்.
