முட்டைகோஸ் வயிற்று கோளாறுகளை சரிசெய்யும். முட்டைகோஸை தினமும் உணவில் சேர்த்து கொள்வது மிகவும் நல்லது. முட்டைகோஸ் சாதம் எப்படி செய்வது என்று பார்க்கலாம்.
சத்தான சுவையான முட்டைகோஸ் சாதம்
தேவையான பொருட்கள்:
முட்டைகோஸ் – 200 கிராம்
வடித்த சாதம் – ஒரு கப்,
கடலைப்பருப்பு – ஒரு டீஸ்பூன்,
பாசிப்பருப்பு – 2 டேபிள்ஸ்பூன் (ஊறவைக்கவும்),
மிளகு – சீரகத்தூள் – ஒரு டீஸ்பூன்,
வறுத்த வேர்க்கடலை – ஒரு டேபிள்ஸ்பூன்,
இஞ்சி – ஒரு டேபிள்ஸ்பூன்,
பட்டை – சிறிய துண்டு,
கொத்தமல்லித்தழை – சிறிதளவு,
எண்ணெய் – ஒரு டீஸ்பூன்,
உப்பு – தேவைக்கேற்ப.
தாளிக்க:
கடுகு, உளுத்தம்பருப்பு – தலா ஒரு டீஸ்பூன்,
கறிவேப்பிலை – சிறிதளவு,
காய்ந்த மிளகாய் – 2,
எண்ணெய் – சிறிதளவு.
செய்முறை:
* கொத்தமல்லி, இஞ்சியை பொடியாக நறுக்கி கொள்ளவும்.
* முட்டைகோஸை பொடியாக நறுக்கி கொள்ளவும்.
* வடித்த சாதம், சூடாக இருக்கும் போதே ஒரு டீஸ்பூன் நல்லெண்ணெய் ஊற்றிக் கலந்தால் பொலபொலவென்று உதிர்ந்துவிடும்.
* கடாயில் சிறிதளவு எண்ணெய் ஊற்றி காய்ந்ததும் தாளிக்கக் கொடுத்துள்ளவற்றை தாளித்து. பட்டை, மிளகு – சீரகத்தூள், கடலைப்பருப்பு, உப்பு, வேர்க்கடலை போட்டுக் கிளறி, ஊறவைத்த பாசிப்பருப்பு, நறுக்கிய இஞ்சி சேர்த்து மேலும் கிளறவும்.
* அடுத்து அதில் துருவிய முட்டைகோஸ் சேர்த்து வதக்கி, சிறிது நீர் தெளித்துப் புரட்டி வேகவிட்டு இறக்கவும்.
* இந்த முட்டைகோஸ் மசாலாவை வெந்த சாதத்தில் போட்டுப் புரட்டி, கொத்தமல்லித்தழை தூவி பரிமாறவும்.
* சுவையான சத்தான முட்டைகோஸ் சாதம் ரெடி.
