முருங்கை கீரை மட்டும் உபயோகித்து பொரியல் செய்வது வழக்கம். அதனுடன் வாழைத்தண்டை சேர்த்து பொரியல் செய்தால் அருமையாக இருக்கும்.
சத்து நிறைந்த முருங்கை கீரை – வாழைத்தண்டு பொரியல்
தேவையான பொருட்கள் :
முருங்கைக்கீரை – 1 கப்
வாழைத்தண்டு – சிறிய துண்டு
வெங்காயம் – 1
தேங்காய் துருவல் – 2 ஸ்பூன்
பச்சை மிளகாய் – 1
சிகப்பு மிளகாய் – 1
கடுகு, உளுத்தம் பருப்பு – தாளிக்க
எண்ணெய் – 2 ஸ்பூன்
உப்பு – தேவைக்கு
செய்முறை :
* முருங்கைக்கீரையை நன்றாக கழுவி சுத்தம் செய்து கொள்ளவும்.
* ப.மிளகாய், வெங்காயத்தை பொடியாக நறுக்கி கொள்ளவும்.
* வாழைத்தண்டை நாரை எடுத்து விட்டு மெல்லி துண்டுகளாக நீளவாக்கில் வெட்டி மோரில் போட்டு வைக்கவும். இவ்வாறு மோர் கலந்த நீரில் வாழைத்தண்டு துண்டுகளை போட்டு வைப்பதால் நிறம் மாறாமல் இருக்கும்.
* வாணலியை அடுப்பின் எண்ணெய் ஊற்றி சூடானதும் கடுகு, உளுத்தம் பருப்பு, காய்ந்த மிளகாய், ப.மிளகாய் போட்டு தாளித்த பின் வெங்காயத்தை போட்டு வதக்கவும்.
* இப்போது வாழைத்தண்டு சேர்த்து ஒரு முறை கிளறி விடவும்.
* வாழைத்தண்டு சற்று வெந்ததும் முருங்கைக்கீரை மற்றும் உப்பு சேர்த்து நன்கு கிளறி மூடி வேகும் வரை மூடி வைக்கவும்.
* இரண்டும் வெந்ததும் தேங்காய் துருவல் சேர்த்து கிளறவும்.
* சுவையும் சத்தும் நிறைந்த முருங்கைக்கீரை வாழைத்தண்டு பொரியல் தயார்.
* சாம்பார் மற்றும் ரசம் சாதத்துடன் தொட்டுக்கொள்ள அருமையாக இருக்கும்.
