வயிற்று கோளாறுகளுக்கு அடிக்கடி புதினா, கொத்தமல்லியை உணவில் சேர்த்து கொள்வது நல்லது. இன்று புதினா-கொத்தமல்லி சாதம் செய்வது எப்படி என்று பார்க்கலாம்.
சுவையான புதினா – கொத்தமல்லி சாதம்
தேவையான பொருட்கள் :
உதிரியாக வடித்த சாதம் – 1 கப்
புதினா – ஒரு கட்டு
கொத்தமல்லி – ஒரு கைப்பிடி
புளி – நெல்லிக்காய் அளவு
மிளகாய்வற்றல் – 3
பூண்டு – 2 பல்லு
இஞ்சி – 1 துண்டு
உளுந்தம்பருப்பு – 1 தேக்கரண்டி
தேங்காய் – 4 தேக்கரண்டி
சீரகம் – 1 தேக்கரண்டி
பெருங்காயம், உப்பு – தேவையான அளவு
தாளிக்க :
நல்லெண்ணய் – 1 தேக்கரண்டி
கடுகு – 1 தேக்கரண்டி
கடலைப்பருப்பு – 2 தேக்கரண்டி
உளுந்தம்பருப்பு – 2 தேக்கரண்டி
பெரிய வெங்காயம் – 1
நிலக்கடலை அல்லது உடைத்த முந்திரி – 1 தேக்கரண்டி
செய்முறை :
* புதினா, கொத்தமல்லி இலைகளை நன்றாக மண் போக அலசி வைக்கவும்.
* வெங்காயத்தை பொடியாக நறுக்கி கொள்ளவும்.
* அடுப்பை மிதமான தீயில் வைத்து வாணலியில் எண்ணெய் விட்டு வெள்ளை உளுந்தம்பருப்பைச் சிவக்க வறுக்கவும்
* வறுத்த பருப்புடன் மிளகாய் வற்றல், பெருங்காயம், புளி, உப்பு, இஞ்சி, பூண்டு போட்டு வதக்கி அலசி வைத்துள்ள கொத்தமல்லி, புதினாவையும் சேர்த்து ஒரு சுற்று கிளறி விட்டு ஆற விடவும்.
* மிக்சியில் ஆறவைத்தவற்றை போட்டு அதனுடன் தேங்காய், சீரகம் சேர்த்து நன்றாக அரைத்தெடுக்கவும்.
* கடாயை அடுப்பில் வைத்து எண்ணெய் ஊற்றி சூடானதும் தாளிக்கக் கொடுத்தவற்றை தாளித்த பின் பொடியாக நறுக்கி வைத்துள்ள வெங்காயத்தைப் போட்டு சிவக்க வதக்கவும்
* வெங்காயம் நன்றாக வதங்கியதும் அரைத்த கலவையை போட்டு 5 முதல் 10 நிமிடங்கள் வரை நீர் வற்றும் வரை வதக்கி இறக்கவும்.
* அடுத்து அதில் உடைத்த நிலக்கடலை அல்லது முந்திரிப்பருப்பையும் எண்ணெயில் வறுத்துக் கலக்கவும்.
* இறக்கிய கலவையில் உதிராக வடித்த சாதத்தை போட்டு கிளறவும்.
* சுவையான புதினா – கொத்தமல்லி சாதம் தயார்.
* இதற்கு இணையாக வெள்ளரிப்பச்சடி, அப்பளம், வடகம் பரிமாறலாம்.
