சப்பாத்தி, நாண், பூரிக்கு தொட்டுக்கொள்ள சூப்பராக இருக்கும் இந்த ஆலு மட்டர் சப்ஜி. இன்று இந்த ஆலு மட்டர் சப்ஜியை செய்வது எப்படி என்று பார்க்கலாம்.
சப்பாத்திக்கு சூப்பரான சைடிஷ் ஆலு மட்டர் சப்ஜி
தேவையான பொருட்கள் :
வெங்காயம் – 2
பூண்டு – 5 பல்
இஞ்சி – 1 சிறிய துண்டு
பச்சை மிளகாய் விழுது – 1 தேக்கரண்டி
தக்காளி – 2
தண்ணீர் – தேவையான அளவு
பச்சை பட்டாணி – 1 கப்
உருளைக்கிழங்கு – 300 கிராம்
உப்பு – தேவையான அளவு
மிளகாய் தூள் – 1 ½ தேக்கரண்டி
கரம் மசாலா – ½ தேக்கரண்டி
மஞ்சள் – ஒரு சிட்டிகை
கொத்தமல்லி இலை – சிறிதளவு
எண்ணெய் – 2 தேக்கரண்டி
சீரகம் – அரை தேக்கரண்டி
செயல்முறை :
* வெங்காயம், தக்காளி, கொத்தமல்லியை பொடியாக நறுக்கி கொள்ளவும்.
* உருளைக்கிழங்கை வேக வைத்து சதுரமான துண்டுகளாக வெட்டி கொள்ளவும்.
* இஞ்சி, பூண்டை விழுதாக அரைத்து கொள்ளவும்.
* பட்டாணியை வேகவைத்து கொள்ளவும்.
* கடாயை அடுப்பில் வைத்து எண்ணெய் ஊற்றி சூடானதும் சீரகம் போட்டு தாளித்த பின் வெங்காயத்தை சேர்த்து வதக்க வேண்டும்.
* வெங்காயம் நன்றாக வதங்கியதும் இஞ்சி பூண்டு விழுதை சேர்த்து வதக்கவும்.
* இஞ்சி பூண்டு விழுது பச்சை வாசனை போனவுடன் தக்காளி, மற்றும் பச்சை மிளகாய் பேஸ்டை சேர்த்து வதக்கவும்.
* தக்காளி நன்றாக குழைய வேகும் வரை வதக்கவும்.
* தக்காளி நன்றாக வதங்கியதும் அதில் பச்சை பட்டாணி மற்றும் உருளைக்கிழங்கை சேர்க்க வேண்டும்.
* இப்போது இதில் உப்பு, மிளகாய் தூள், மஞ்சள் தூள் மற்றும் கரம் மசாலா தூள் சேர்த்து நன்றாக கலக்க வேண்டும்.
* அடுத்து அதில் ஒரு கப் தண்ணீர் சேர்த்து கறியை நன்கு கொதிக்க விடவும்.
* உருளைக்கிழங்குகளை லேசாக மசித்து விடவும்.
* கடைசியாக கொத்தமல்லி தழை தூவி இறக்கி பரிமாறவும்.
* இப்போது, உங்களுடைய ஆலுமட்டர் சப்ஜி ரெடி.
