தேவையான பொருட்கள்
கேழ்வரகு மாவு (அ) ராகி மாவு – 100 கிராம்
தேங்காய் துருவல் – 50 கிராம்
பெரிய வெங்காயம் – 1
மிளகாய் – 2
சுடுதண்ணீர் – 30 மி.லி.
முந்திரி – 3
எண்ணெய் – 2 டீஸ்பூன்
கடலைப் பருப்பு ½ டீஸ்பூன்
கடுகு – ½ டீஸ்பூன்;
உளுத்தம் பருப்பு – 1 டீஸ்பூன்
உப்பு – ½ டீஸ்பூன்
கறிவேப்பிலை – சிறிதளவு
மல்லித்தழை – சிறிதளவு
செய்முறை :
ராகி மாவுடன் சுடு தண்ணீர், உப்பு சேர்த்து உதிரும் பதத்தில் பிசைந்து கொள்ளவும். கொள கொள என்று பிசையக் கூடாது. ரவை சலிக்கும் சல்லடை (அ) கோதுமை சலிக்கும் ஸ்டெயின் லெஸ் ஸ்டீல் சல்லடையில் மாவைத் தேய்த்து சலித்துக் கொள்ளவும். மிகவும் மிருதுவாக இருக்கும் மாவை, இடியப்பத் தட்டிலோ (அ) இட்லி தட்டிலோ வைத்து சுமார் 10–12 நிமிடங்கள் வேக வைத்து இறக்கவும். கடாயில் எண்ணெய் சேர்த்து, சூடானதும் கடுகு, கடலைப் பருப்பு, உளுத்தம் பருப்பு, நறுக்கிய முந்திரி, வெங்காயம், வரமிளகாய், கறிவேப்பிலை, மல்லித்தழையைச் சேர்த்து, கருகாமல் வதக்கவும். அதனுடன் வேக வைத்து இறக்கிய ராகி மாவைச் சேர்த்து நன்கு கலக்கிப் பிரட்டவும். தேவையெனில் உப்புச் சேர்க்கலாம். சுவையான புட்டு தயார்.
குறிப்பு :
* சின்ன வெங்காயம், பச்சை மிளகாய் பயன்படுத்தியும் கேழ்வரகு புட்டு செய்யலாம்.
* வேண்டுமெனில் பொடியாய் நறுக்கிய கேரட், பீன்ஸைச் சேர்த்தும் புட்டு செய்யலாம்.
* உதிரியாய் இருந்தால் தான் புட்டு சுவைக்கும்.
* ராகியில் அதிக சுண்ணாம்பு சத்தும், புரதச் சத்தும், நார்ச் சத்தும் நிறைந்துள்ளன.
* பிறந்த குழந்தைக்கு ஆறு மாதத்தில் இருந்து தரக்கூடிய முதல் மாவு, கேழ்வரகு மாவு.
* குழந்தைகளின் வளர்ச்சிக்கு மிகவும் ஏற்றது.
* புட்டு சாப்பாடாக வேண்டுமெனில் ராகியைப் பிரட்டும் போது சிறிது தண்ணீர் தெளித்து பிரட்டினால் போதும். 
